A Asociación de Veciños de Sobradelo, encabezada polo seu presidente Anxo Lúa, mobilizouse este domingo diante da propiedade da Igrexa para reivindicar a cesión dunha franxa de terreo imprescindible para completar a mellora da Rúa Ameixeiras. Segundo denuncia a asociación, a negativa da Igrexa a ceder este espazo está a impedir a finalización das obras e a garantía dunha seguridade viaria axeitada para vehículos e peóns.
UNHA OBRA NECESARIA E INACABADA
O proxecto de mellora da Rúa Ameixeiras contemplaba a creación dun vial máis seguro, cun investimento de 72.500 euros, co obxectivo de facilitar unha circulación fluída e, sobre todo, protexer aos peóns. Non obstante, a continuidade da rúa está bloqueada debido a que unha parte do terreo necesario segue sendo propiedade da Igrexa, que se nega a cedelo se non recibe unha contraprestación a cambio.
“Sabemos que houbo negociacións entre o Concello de Vilagarcía e a Igrexa para desbloquear a situación, pero ata o de agora non se chegou a ningún acordo”, explica Anxo Lúa. “Nós xa trasladamos ao Arcebispado a demanda veciñal con preto de 500 sinaturas, pero a resposta foi decepcionante: non cederán sen recibir algo a cambio”.
UN TRATO DESIGUAL CON RESPECTO A OUTROS PROPIETARIOS
A Asociación de Veciños de Sobradelo denuncia que a postura da Igrexa contrasta coa de outros propietarios particulares da contorna, que en situacións semellantes cederon terreos de forma altruísta para mellorar a seguridade viaria. Como exemplo, lembran a cesión que se fixo en Benceslao Fernández Flórez, que permitiu dotar de accesos en condicións á urbanización Piñeiriño.
“Se os veciños foron quen de entender a importancia de colaborar polo ben común, non se entende que a Igrexa actúe con criterios distintos e esixa unha contrapartida”, critica Lúa. “De feito, esta actitude pode incluso rozar algún dos sete pecados capitais”, engade ironicamente.
EXIXEN UNHA SOLUCIÓN INMEDIATA
A veciñanza alerta de que a situación non pode seguir bloqueada indefinidamente, pois afecta directamente á seguridade das persoas que transitan pola zona. Ademais, consideran que a Igrexa, como entidade con peso social, debería ser a primeira en dar exemplo e colaborar co benestar da comunidade.
Desde a Asociación de Veciños de Sobradelo fan un chamamento ao Arcebispado para que reconsidere a súa postura e permita a cesión do terreo de forma inmediata, garantindo así a finalización das obras e a mellora da seguridade viaria en toda a zona.
